ធ្វើការច្រើនភាពតានតឹងក៏រមែងតែមកញាំញីជារឿងធម្មតា ។ ដូច្នេះយើងត្រូវធ្វើលំហាត់ប្រាណ រាងកាយខ្លះផងដើម្បីឱ្យរាងកាយនិងស្មារតីបានធូរស្បើយហើយអាចបន្តការងារតទៅទៀត ។ មុន នឹងចាប់ផ្តើមធ្វើត្រូវធ្វើចិត្តសមាធិដោយការបិទភ្នែកដកដង្ហើមចូលយឺតៗឱ្យបានវែងបំផុតនិង ដកដង្ហើមចេញយឺតៗជាមុនសិន ។
១-ធ្វើលំហាត់ប្រាណខ្នង
-លើកដៃទាំងសងខាងឱ្យខ្ពស់ត្រឹមទ្រូង ស៊កម្រាមដៃស្រាក់គ្នារួចដាក់បាតដៃបែរចេញក្រៅសន្ធឹង ដៃឱ្យឆ្ងាយបំផុតតាមដែលអាចធ្វើទៅបាន ។ ព្យាយាមធ្វើយ៉ាងណាឱ្យខ្នងត្រង់និងដៃដាក់ស្របនឹង កម្រាលរំកិលដៃទាំងសងខាងនៅខាងស្តាំរួចត្រឡប់មកត្រង់ផ្នែកខាងមុខហើយរំកិលដៃបន្តទៅខាងឆ្វេង ធ្វើឆ្លាស់គ្នាទៅមក១០-១៥ដង ។
២- ធ្វើលំហាត់ប្រាណ-ក
-យកបាតដៃម្ខាងរុញថ្ងាសទៅក្រោយ ខណៈដែលក្បាលព្យាយាមទប់រុញទៅខាងមុខ ដោយបញ្ចេញ កម្លាំងទប់គ្នារយៈពេល ១០-១៥ វិនាទី ។
-ស្រាក់ដៃដាក់ទៅខាងក្រោយក្បាលបញ្ចេញកម្លាំងឱ្យក្បាលរុញដៃ ដៃរុញក្បាលប្រមាណជា១០-១៥វិនាទី ។ លំហាត់ពីក្បាច់នេះនឹងធ្វើឱ្យសាច់ដុំកបានបញ្ចេញកម្លាំង ។
៣-ធ្វើលំហាត់ប្រាណស្មា
- លើកដៃដាក់ឱ្យប៉ះស្មាទាំងសងខាងឱ្យកែងដៃចង្អុលទៅខាងក្រោយឱ្យអស់តាមដែលអាចធ្វើទៅបាន រួចឱនខ្លួននិងស្មាទៅខាងមុខព្យាយាម ធ្វើយ៉ាងណាឱ្យកែងដៃទាំងសងខាងប៉ះឱ្យជិតបំផុតធ្វើ ដដែលៗ១០ដង ។
- លើកដៃប៉ះស្មាទាំងសងខាងរួចលើកកែងដៃឡើងចុះៗធ្វើដដែលៗ១០ដង ។
៤- ធ្វើលំហាត់ប្រាណដងខ្លួន
- អង្គុយលើកៅអីដាក់ប្រអប់ជើងទាំងពីរជាប់កម្រាលដៃទាំងសងខាងចាប់ជ្រុងកៅអីរួចពត់ខ្លួន ទៅខាងស្តាំឱ្យអស់ប៉ុន្តែប្រអប់ជើងនៅជាប់ កម្រាលដដែលទុកប្រមាណជា៥-១០វិនាទីធ្វើឆ្លាស់ គ្នាឆ្វេងស្តាំ ។ ក្បាច់នេះជាការសម្រកខ្លាញ់ត្រង់ បរិវេណចង្កេះនិងដងខ្លួនផងដែរ ។
៥- ធ្វើលំហាត់ប្រាណដៃ
- ធ្វើចលនាដៃទាល់តែមានអារម្មណ៍ថាតឹងត្រង់ដៃ និង ចង្កេះ ។ បន្ទាប់ មកត្រូវដកពន្យឺតដៃខាង ស្តាំឱ្យខ្ពស់បំផុតតាមដែលអាចធ្វើទៅបានទុកប្រមាណ ជា១០វិនាទីរួចប្តូរមកធ្វើខាងឆ្វេងវិញម្តង ។
- បោះដៃទៅខាងមុខពត់មេដៃមុនរួចពត់ម្រាមទាំងបួនចុះយឺតៗ ។ បន្ទាប់មកលើកម្រាមឡើងម្តង មួយៗយឺតៗធ្វើប្រមាណជា៣-៤ដង ។
៦- ធ្វើលំហាត់ប្រាណជើង
- ឈរខ្លួនឱ្យត្រង់រួចទច់ជង្គង់ចុះធ្វើដូចកំពុងតែចង់អង្គុយទុកប្រមាណជា ១៥-៣០ វិនាទីរួចឈរឡើង ធ្វើដដែលៗប្រមាណជា៣ដង ។
- ឈរខ្លួនឱ្យត្រង់ឈានជើងមួយទៅខាងមុខរួចចំទើតចុងជើងឡើងលើឱ្យតែកែងជាប់កម្រាល បានហើយបន្ទាប់មកបន្ទន់ជង្គង់ជើងក្រោយចុះយឺតៗ ដោយដៃទាំងពីរដាក់នៅលើភ្លៅខាងមុខ ទុកប្រមាណជា១០-១៥វិនាទីធ្វើឆ្លាស់គ្នាឆ្វេងស្តាំ ។
- អង្គុយដាក់ខ្នងឱ្យត្រង់បង្វិលកជើងខាងស្តាំ១០-១៥ដង រួចឆ្លាស់មកធ្វើជើងឆ្វេងវិញម្តង ។
- ឈរខ្លួនឱ្យត្រង់ចំទើតជើងឡើងទុកប្រមាណជា១០វិនាទីធ្វើដដែលៗ៣-៥ដង ៕
